دروست کردنی نائومێدی

دروست کردنی نائومێدی
لەکۆمەڵگا مرۆییەکان هەمیشە کەسانێک هەن وەک تەوژمێکی وێرانکەر  دروست کردنی نائومێدی و هیوابڕاوکردنی کۆمەڵگاو ژیان بە ئەرکی لە پێشینەی خۆیان دەزانن. 
ئەم بکەرو لایەنانە بێ ئەوەی  رۆژێ لە رۆژان تۆزقاڵێک هەست بە بەرپرسیارەتی نیشتیمانی، کۆمەڵایەتی، ئایینی و  سیاسیەوە بکەن، لە تەوزیف کردنی نائومێدی و بەگژیەکداکردنەوەی حەقیقەت و درۆو چەواشەکاری، سڵ لە هیچ هەوڵێک ناکەنەوە. 
دۆخی سایکۆجیای ئەم تایپە لە کۆمەڵگا، دۆخێکی رووخاوی دەروونی ئاڵۆز و هەڵگری کۆمەڵێک تایبەتمەندی زۆر خراپ و گرێی دەروونیە بەرامبەربە  ئەو هێزو لایەن و بکەرانەی هەوڵی خزمەت و چاکەی گشتی و خێریان لە سەرووی هەموو ئامانج و ئەرکێک داناوە. 
لایەن و بکەرە دژەکانی ئاشتی و ئارامی کۆمەڵگا بە سود وەرگرتن لە گشت ئامرازەکانی مەس مێدیای بینراوو بیستراوو نووسراوەوە، هەڵتەکاندنی بونیادی ئاشتی و پێکەوەژیان و هارمۆنیای کۆمەڵگا بە ئەرکێکی لە پێشینەی خۆیان دەزانن و خۆشبەختانەش لە زۆربەی حاڵەتەکاندا هەوڵەکانیان شکست دەهێنێ و جگە لە شەرمەزاری، چیتریان بۆ نامێنێتەوە. 
ئەمان وەک بڵێی ئەگەر رۆژێک واز لە درۆسازی و بەهەڵەدابردن و بە لارێدابردن و تێکدان بهێنن، تەڵاقیان دەکەوێ، ئالودەی مەیلی وێرانکردن و دروست کردنی گێژاوو فەوزای بەردەوامن. هەمیشەش ئامادەن درۆیەک دروست بکەن، لە رێگەیەوە سواری شەپۆلی نارەزاییەکانی کۆمەڵگا بن و دەسکەوتی بێ بایەخی کاتی بەدەست بێنن و ئەسپی خۆیان لەم رووبەرەدا تاو بدەن. 
لەوەتەی کابینەی نۆهەم و سەرۆک و ستافەکەی دەست بەکاربوونە، بکەرەکانی سەربە دونیای ناشرینیەکان رۆژێک چیە، لە پەلاماردان و سوکایەتی بە سەرۆکی حکومەت نەکەوتوون. 
قیژەقیژ و بەندوبالۆرەکانیان ئەوەندە قێزەوەن و گەنن، ناتوانن قەناعەت بە هیچ مرۆڤێکی عاقڵ و ژیر بکەن. هەر رۆژەو بە شتێکەوە دەیگرن و بابەتێک دەکەن بە کەرەسەی ئیعلامی  پەلاماردان و فوو تێکردن و سوکایەتی بە حکومەت و هەرێم و سەرۆکەکەیەوە. 
دژایەتی بەرەی بە ناو ئۆپۆزیسیۆن و لایەنگرانیان هیچ بنەمایەکی عەقڵانی و زانستی نیە.  ئەمانە وەک بڵێی خوویان بە دژایەتیەوە گرتووە، هیچ هەنگاوێکی حکومەت بە ئەرێنی سەیر ناکەن و سوێندیان خواردووە بە هیچ دوعایەکی سەرۆکی حکومەت نەڵێن ئامین و هیچ قسەیەکی باشیش بۆ خزمەت چاکەی گشتی و ئارامی کۆمەڵگا نەکەن. 
دونیای سایکۆژیای ئەم بەرە  خودئەوینیە( خۆپەرەست)لە رووی ئاستی بەرپرسیارەتی مۆراڵی کۆمەڵایەتیەوە، دونیایەکی تا بڵێی ئاڵۆزو شێواوە. ئەم بەرەیە نەفرەت لە گشت هەنگاوێکی کارای  چاکسازی و کاری باشەوە دەکات و تووشی پەتای کوشندەی خودنەفرەتی” درێژ خایەن هاتووە. 
ئەندامانی ئەم بەرەیە نەفرەت لە هەموو جوانیەک و هەنگاوێکی چاکسازیەوە دەکەن و هەر هەوڵ پرۆژەو پێشنیارێک و رێو شوێنێکی حکومەت بە ئاراستەی خزمەت و چاکەی گشتی رەت دەکەنەوەو بەرگی چەواشەکاری بەسەردا دادەپۆشن و لە پێش چاوی خەڵک ناشرینی دەکەن. 
لێ  ئەم هەموو پەلامارە ئەوپەڕی  بێ ویژدانیە. ئامادەیی خووی تێکدان، خووێکی ناشرین و ناشایست و نمەک بە حەرامیە. 
 تۆ بتەوێ بە ناشرینکردنی لایەنی حکومی و سەرۆکەکەی، خۆت و ئایدیاکانت بە جوانی وێنا بکەی و وا لە هاونیشتیمانیان بگەیەنی داری سیحریت پێیەو فریاد رەس و خدری زیندەی و هەموو چارەسەرێک و هیواو ئومێدێک لە دژایەتی کردنی حکومەت کورت بکەیتەوەو خۆت بە سوارچاکی گۆڕەپانی ئاڵۆزی سیاسەت و سیاسەتبازی وێنا بکەیت.