ئەو فرە کوێخاییەی لە گۆڕەپانی سیاسی عێراقیدا لەم رۆژگارە دەبینرێت، لەهیچ سەردەم و قۆناغێکدا نەبینراوە.
عێراق بە رووکەش وڵاتێکی خاوەن سیادە و شکۆو سیستەمێکی دیموکراسیە. بەڵام لە ناواخندا گیرۆدەی دەستی دەیان گرووپی میلیشیایی و سیاسیە بەکرێ گیراوەکانی ئەملاو ئەولایە.
بەڵای ئەم فرە کوێخایی و فرە جەمسەریە لە ژیانی رۆژانەی عێراقیەکاندا زۆر بە زەقی رەنگی داوەتەوە. دوای بیست ساڵ لە رووخانی بەعس، ئەم وڵاتە سەرباری داهاتێکی زۆرو سەروەت و سامانێکی بێ شومار، هێشتا رووی ئاسودەیی و خۆشگوزەرانی تەواوی نەبینیوەو هەر رۆژەو بە دەست کێشەیەکەوە گیر دەخوات و دەستی دەرەکی دەستی ناوەتە بینە قاقای ئەم وڵاتەوە.
رووخانی سەدام بە لای عێراقیەکانەوە وێنای خاڵێکی وەرچەرخانی گەورەی یەکلاکەرەوەی لێدەکرا و ئومێدێکی زۆری لەسەر هەڵچنرابوو.
لێ ساڵانی دوای رووخانی بەعس، ئەو ژینگە سیاسیەی نەهێنا ئاراوە ببێ بە بنەمای یەکتر قەبوڵ کردن و پلۆراڵیزم و گەشەی وڵات و هێنانەدی خواست و ئومێدی عێراقیەکان.
لە بری ئەمە چارەنووسی ئەم وڵاتە لە نێو گێژاوی ململانێ تائیفی و سیاسیەکاندا قەتیس ماوەو هەر رۆژەو بەدەست بەڵاو کارەسات و کێشەو گرفتێکی تازەوە دەناڵێنێ.
لەملاشەوە وەلا و وابەستەبوونێکی سەرسووڕهێنەری هێزە شیعیەکان بۆ لایەنی دەرەکی، بە یەکێک لەو گرفتە گەورانەی دونیای سیاسەت هەژمار دەکرێ و دیارنیە کەی ئەم بەڵایە لە کۆڵ عێراقی فیدڕاڵی دەبێتەوەو سەروەری و شکۆ ی بۆ سەرجەم گەلانی ئەم نیشتیمانە فرەنەتەوەو ئایین و ئایینزایە دەگەرێتەوە.
وەڵام بدەوه