کەڕەکانی شەربەت یا کاهینەکانی بەغدا
گفت و لفت و قسەوباس و لێدوانی هەندێ کەسی نابەرپرس و لە گوێی گادا نووستوو لە مانگ و ساڵەکانی رابردوو وەک کەڕەنای رۆژی دوایی، شەوورۆژ گوێی کوردستانیانی کەڕ و کەلەسەری هاونیشتیمانیانی کاس کردبوو.
لێدوان لە دوای لێدوان و گفت و لفت و سمینارو دیدار و چاوپێکەوتن نەما ئەمان نەیکەن بۆ قەناعەت پێ هێنانی کوردستانیان بەوەی ڕادەست کردنی نەوتی کوردستان بە بەغدا یەکسانە بە خۆشگوزەرانی بێ سنوور و کەڵەکەکردنی پارەوپوڵ و بودجەی هاتوو لە بەغداو بەرزکردنەوەی کوالێتی ژیان لە هەرێم.
ئەوە نزیک دەبینەوە لە ساڵێک. فرۆشی نەوت بە کۆمەڵێک بڕۆوبیانووی بێ بنەماوە ڕاگیراوە. داهاتەکانی هەرێم بۆ خوارترین ئاستەکانی دابەزیوە. دەیان وەفد و شاندو شالیارو ئەم و ئەو سەردانی بەغدایان کردووە بۆ یەکلایی کردنەوەی پرسەکان. بەڵام حوکمڕانانی بەغدا نەک بودجەو شایستەداراییەکانی کوردستانیان نانێرن، بەڵکو ئەوەی دەشینێرن وەک خێروسەدەقە و چاکەو سەرفترە دەینێرن و چەندین ناوی جیاوازیان لێ ناوە.
حەقە کاهینە کوردەکانی پەرستگای بەغدا و پروپاگندەکارو داکۆکیکارانی ڕادەست کردنی نەوت بە بەغدا بێنە قسەو خۆیان لە حەقیقەتەکان نەدزنەوەو بە ئاشکرا داوای لێبوردن لە گەل و نیشتیمان و کاسبکارو مامۆستاو موچەخۆرو خانەنشینان بکەن و بەرپرسیارەتی ئەم دۆخە سەختە دارایی و ئابوریەی تەنگی بە هەرێم هەڵچنیوە هەڵگرن و خۆیان لە بەرپرسیارەتی ڕاوبۆچوون و کردەو کردارەکانیان نەدزنەوە.
وەڵام بدەوه