کورد چیتر خۆی پێ بچووک نیە
حەماس و خرۆشانە جەماوەریەکەی ئەمجارەی کوردان، زادەی لێکەوتە تراژێدیاکانی دووبارە بوونەوەی مێژووی قوربانیدانەکانی کورد بوو.
مێژووی نەتەوەی کورد لە چەشنی گەورەترین نەتەوەی بێ دەوڵەت و ستەملێکراوی دەستی ستەمی واقع و مێژوویەکی خوێناوی و دیفاکتۆیەکی بەزۆر بەسەردا سەپێنراو، پڕیەتی لە تراژێدیا کارەسات و مەینەتی.
کورد لە میانەی تێپەڕبوون بە ناو قۆناغەکانی ئەم مێژووە خوێناویەدا بە بارتەقای دە دەوڵەتی کوردی خوێنی داوەو تێکۆشانی کردووە، بەڵام بەهۆی یەک نەگرتوویی و پەرتەوازەیی بوون و ئاڵۆزی هاوکێشەسیاسی و ئابوری و ستراتیژیە ناوچەییەکانەوە نەیتوانیوە قۆناغە سەختەکان ببڕێت و کەشتیە شڕوشەپڕێوەکەی لە کەنارێکی ئارام لەنگەر بگرێت.
خرۆشانە جەماوەریە بەرفراوانەکەی ئەمجارەی کورد لە کوردستانی باشور بە گشتی و تاراوگە بە تایبەتی، دەرخەری حەقیقەتی زیندووێتی و گەورەیی نەتەوەیەکە، هێشتا زولمی مێژوو و ستەمی ستەمکاران نەیتوانیوە بە چۆکیدا بدات و لە ئیرادەی بخات. بەڵکو سەلماندی ئەم گەلە چیتر خۆی پێ بچوک و دەستەوەستان و بێ دەسەڵات نیە.
رۆژئاواو رووداوە کتوپڕو دڵتەزێنەکانی رووبەری خاکی کوردان و حەماسی جەماوەری کورد لە گۆشەو کەناری جیهان، لەم بەشەی رۆژئاوای کوردستان بوون بە هەوێنی یەکگرتوویی و یەکڕیزی کورد و زیندووکردنەوەی گوتارێکی نەتەوەیی و نیشتیمانی و هێمایەک بۆ دوارۆژێک، تیایدا کورد بە ئامانجە نەتەوەیی و نیشتیمانیەکانی بگات و قۆناغەکان ستەم و نکۆڵی لێکردن تێپەڕێنێت.
وەڵام بدەوه