بەئامانج گرتنی پێشمەرگە تاوانێکی نەبەخشراوە

بەئامانج گرتنی پێشمەرگە تاوانێکی نەبەخشراوە
هێزی پێشمەرگەی کوردستان دوورو نزیک پەیوەندی بەو شەڕەی ئێستای رۆژهەڵاتی ناوەڕاستەوە نیە. زیاد لەمەش هەر لەیەکەم رۆژی هەڵگیرسانی جەنگ، هەرێمی کوردستان بێلایەنی و هەڵوێستی ڕەسمی خۆی لە رێگەی بەیانامەو دیدارو چاوپێکەوتن و  میدیاو کەناڵەکانی دیپلۆماسیەوە،  چەندین جار دووپات کردۆتەوە.
هێزی پێشمەرگەی کوردستان هێزێکی نیزامیە بۆ بەرگری کردن لە کوردستان و پاراستنی ئاسایش و رێگەگرتن لە هەر جۆرە دەست درێژیەک.
شوناسی پێشمەرگەی کوردستان، شوناسێکی کوردستانی و  بەرگری کردن لە نیشتیمان و گرتنەبەری سیاسەتی  ئاشتی و خۆپارێزیە،  نەک پەلاماردان و هێرش کردن.
هەر لە ڕاپەڕینی بەهاری نەوەدوویەکەوە تا ئەمڕۆ، هەرێمی کوردستان و هێزی پێشمەرگە بەردەوام لە لایەن هێزە دەرەکی و بەکرێ گیراوو دژە یاساکانەوە پەلامار دراوەو ڕووبەڕووی بژاردەکانی بەرگری یا خۆ ڕادەست کردن و تەسلیم بوون بۆتەوە. 
سرووشتی هێزی پێشمەرگەی کوردستان و ئەو ئامانج و ستراتیژیەی لە پێناوی دامەزراوە،  نیشتیمانی و نەتەوەیین و ئەم هێزە هەرگیز لە هیچ تێهەڵچوون و یاڵۆزی و گرژی و جەنگێکدا نەگلاوەو  خۆی پاراستووە. نەک لەبەر ئەوەی بێ هێزو دەستەوەستان و لاوازە، بەڵکو هەر ئەمە بووە ستراتیژی کار کردنی  و ئامانج لە دامەزراندنی  . 
بە ئامانج گرتن و شەهیدو بریندار کردنی پێشمەرگە لەلایەن هێزە تاریکپەرەست و بکەرانی دژەیاساو کلکەکانیانەوە،  پەڵەیەکی پڕ لە شەرمەزاری و نەنگی و تاوانێکی نەبەخشراوو لە بیرنەکراوەو پێویستە سنوورێکی بۆ دابنرێت. ئەگینا ئەمە نە یەکەمین و نە دواهەمین تاوان دەبێت دەرحەق بە پێشمەرگەوە لە لایەن تاوانبارانی جەنگ و جەلادە بێ مۆڕاڵەوە  ئەنجام بدرێت.