پرۆکسیە بەکرێ گیراوەکان

پرۆکسیە بەکرێ گیراوەکان
لەبەختی بەدی کورد و شانسی هات و نەهاتیشدا دوای  ڕمانی ئیمپراتۆریەتی عوسمانی و کێشانی سنوورە جوگرافیەکانی عێراق، بەشێک لە کورد و خاکەکەی بێ پرس و ڕاوەرگرتن خرایە سەر ئەم عێراقە. وەنەبێ بەشەکانی تری خاکی کوردان قازانجیان لەم دابەشکاریە وەرگرتبێ. 
عێراقێک تەنانەت دوای خەلافەتی خولافای راشدینیش و بە دیاری کراوی لە دەسپێکی حوکمڕانی حەجاجی کوڕی یوسفەوە چەقی شەڕو ئاڵۆزی و پێکدادان و کوشتن و بڕین و وێرانکاری و جەنگی تائیفی بووە. 
ئەوەی ئێستا لە پانتای سیاسەت و شانۆی سیاسی و ئاڵۆزیە بەردەوامەکانی عێراقیدا دەبینرێت، درێژکراوەی هەمان بارودۆخ و حوکمڕانی هەمان عەقڵیەت و دونیابینیە تەسک و تائیفیە و هیچ گۆڕانکاریەکی  ئەرێنی ئەوتۆی بەسەردا نەهاتووە و کەوتۆتە  دەست میلیشیا لە یاسا دەرچووەکانی قۆناغی دوای بەعس. 
هێرشە درۆنیەکانی میلیشیاکان بۆ سەر هەرێمی کوردستان دوژمنکاریەکی ئاشکرای ئەو هێزە پرۆکسیانەیە، تا سەر ئێسقان لە ناو زەلکاوی دەمارگیری و شۆفینیزمی نەژادیەوە نوقم بوونەو خەریکە وڵاتێک لەگەڵ خۆیان بەرەو وێرانی ئەبەن.