سیحری ناسیۆنالیزم

سیحری ناسیۆنالیزم
ناسیۆنالیزم یا قەومگەرایی لە ناو میللەتان کەرەسەو ئامرازێکە بۆ یەکگرتوویی ڕیزەکانی گەل، لە پێناو مانەوەو لەناو نەچوون و بەردەوامبوون و لەسەر پێ وەستان وەک گەلێکی زیندوو. 
ناسیۆنالیزم بە درێژایی مێژووی گەلان ئامرازێکی مەعنەوی و فکری بووە بۆ دروست کردنی دەوڵەتی نەتەوەو سەربەخۆیی و پاراستنی نیشتیمانەوە.
پەیوەست بە کوردەوە بە داخەوە چەمکی ناسیۆنالیزم بە هۆی جەمسەربەندیە ناوەخۆییەکان و دوورکەوتنەوەی ئەو گرووپ و ئەحزابەی لەسەردەمانێک ئیدیعای هەڵگرتنی دروشمی نەتەوەو ناسیۆنالیزمیان دەکرد و ئێستاکە خۆیان لەم درووشمانە داماڵیوە،  دووچاری پەرتەوازەییەکی سەیرو کوشندە هاتووەو ئاڕاستەیەکی تری گرتووەتە بەر.  
تێکدانی ڕیزەکانی یەکگرتوویی لەلایەن کۆمەڵێک بکەرو حزب و گرووپی بەرژەوەند گەراوە، بۆ نەتەوەیەکی پەرتەوازەی وەک کورد بەم حاڵەی ئێستایەوە، ئاوکردنە ئاشی نەیارانی کوردو ئامانجە ناتەوەییەکانە نەک شتێکی تر. 
ئەم پەرتەوازەییە ناوەکیەی هۆکارگەلێکی زۆری بابەتی و زاتی لە دروست بوونی رۆڵێکی گەورە دەگێڕن،  دۆخێکی پڕلە نیگەرانی و مەترسی هێناوەتە ئاراوەو دیار نیە بەم حاڵەوە لە کام کەنار دەریایەک لەنگەر دەگرێ. 
ناسیۆنالیزم بە گشت دیوە باش و نەرێنیەکانیەوە، ئەشێت ئامرازی یەکگرتوویی و زیندووێتی و سیحری بەهێزمانەوەی نەتەوەیەکی پەرتەوازەی وەک کورد بێت، نەک کەرەستەیەکی هەرزانی نێو مێژوو بۆ بانگەشەو هاشوهوشی میدیایی و سەرقاڵکردنی کۆمەڵگا.