چەند دێڕێک سەبارەت بە ئۆپۆزیسیۆنی پڕ لە ژاوەژاو

چەند دێڕێک سەبارەت بە ئۆپۆزیسیۆنی پڕ لە ژاوەژاو
ئۆپۆزیسیۆن یا بەرهەڵستکار مەفهومێکی گشتیە لە سیستەمە دیموکراسیەکان و ئەوکۆمەڵگایانەی چەندین قۆناغی سەخت و ناهەمواریان لە گەیشتن بە ترۆپکی ئازادیدا بڕیوە. 
لە کۆمەڵگا دیموکراسیەکان ئەو حزب و گرووپانەی سەربەم بەرەیەن، هەمیشە لە رێگەی چاودێری کردنی حکومەتەوە ئەشێن کێماسی و چەوتی و لاریەکان دەست نیشان بکەن و رێگە چارەکان بخەنە روو. 
ئۆپۆزیسیۆن لە دونیای ئازادو دیموکرات و لیبراڵ،  پێکهاتەیەکی هەمەجۆرە لەو ئاڕاستەو گرووپە سیاسیانەی بەردەوام لە رێگەی چالاکی نواندن و هەوڵدان بۆ چاکەی گشتیەوە، جوانترین پێشنیارو ئەلتەرناتیڤی چارەسەر دەخەنە روو و  تەواوکەری حوکمرانین و گوێیان لێ دەگیرێ و پێشنیازو ڕاوبۆچوونەکانیان بە هەند وەردەگیرێ و دوورن لە هەرجۆرە هەوڵێکی تێکدەرانەو ئاژاوەنانەوەو ژاوەژاوی سیاسی و کۆمەڵایەتیەوە. 
ئۆپۆزیسیۆنێکی لەمجۆرە ئاواتی هەموو کوردە. کورد لە هەموو نەتەوەیەک  زیاتر پێویستی بە ئۆپۆزیسیۆنێکی چالاک و هۆشیارو بەرپرسیارو چاکەخوازە، تا لە رێگەی دەست نیشان کردن و پەنجەخستنەسەر چەوتیەکانەوە،  بەرچاوروونی بخاتە بەردەم حکومەتەوەو هاوکاری چارەسەری ئەو تەنگوچەڵەمەو گرفت و کێشانە بێت، کۆمەڵگای لە جموجۆڵ خستووەو دۆخێکی نابەرامبەرو پڕلە نادادی بەرهەم هێناوە. 
کورد پێویستی بە ئۆپۆزیسیۆنێک نیە لە رێگەی هاشوهوشی مێدیایی و هەڵاوبەزمی سۆشیال مێدیاوە، ببێت بە سپۆنسەری چالاکی کارگەکانی جنێوفرۆشی و دەمشڕی و تێکدانی شیرازەی کۆمەڵایەتی و  بەرهەم هێنانی فەوزای جڤاکی و رووبەرووکردنەوەی چینوتوێژەکانی کۆمەڵگا بەکتریەوە، لە پێناو دەست خستنی چەند دەنگێک و ماسی گرتن لە دۆخی ئاڵۆزی کۆمەڵگاوە.