هاڕینی عەلی زەیدی لە نێوان دوو بەرداشدا

هاڕینی زەیدی  لە نێوان دوو بەرداشدا
حاڵی حازر هەردوو بەرەی ئیدارەی ئەمریکاو زەیدی چەقی رووداوو گۆڕانکاریە  سیاسیەکانی گۆڕەپانی سیاسەتی عێراقن. ئەمریکا بە ئەجیندای پەڕوباڵ کردنی میلیشیاکانی سەر بە ئێران و زەیدیش، ئەگەر بە رواڵەتیش بێت، خوازیاری گێڕانەوەی شکۆن بۆ حکومەت و دەوڵەتداریەوە. 
هەر چەندە زەیدی لە میانەی پرۆسەیەکی دیموکراسی هەڵبژاردندا نەهاتۆتە سەردەسەڵات و کاندیدی پەسەندکراوی چوارچێوەی هەماهەنگی، بۆ ئەم قۆناغە، و پەسەندکراوی ئیدارەی ئەمریکایە، لێ رەنگە لە درێژ مەودادا نەتوانێ هاوسەنگی نێوان خواستەکانی ترامپ و ئێران لە هاوکێشە سیاسیەکان رابگرێ. 
هیچ گومانی تێدانیە چوارچێوەی هەماهەنگی بۆ دەربازکردنی خۆیان لە چنگ فشارەکانی ئەمریکاوە زەیدیان خستە سەر تەختی شانۆی سیاسیەوەو پاڵپشتیان کرد. زەیدی نە خاوەنی ئەزمونی سیاسیە و نە سەربە حزب و کوتلەیەکی پەرلەمانی دیاریکراویشە. بەڵام هێنانە پێشەوەی دەرفەتێکی باش بوو بۆ چوارچێوەی هەماهەنگی تا  فۆکسی ئیدارەی ترامپ لەسەر خۆیان لابدەن و لە نزیکەوە چاودێری هەڵسوکەوت و بڕیارو جووڵەکانی زەیدی بکەن. 
بیریشمان نەچێ هەژمونی ئێران بەسەر ناوماڵی شیعە لە رێگەی میلیشیاو دەستوپێوەندیەکانیان لە هەژمونی ئەمریکا زیاترەو هیچ سەرۆک وەزیرانێک لە دوای رووخانی بەعسەوە بە بێ رەزامەندی و موبارەکەی ئێران نەیتوانیوە بۆ ماوەیەکی درێژ لەسەر دەسەڵات بمێنێتەوە. 
بۆیە دوای  سەردانەکەی زەیدی بۆ ئەمریکا، زەیدی  ڕووبەڕووی کۆمەڵێک ئاڵنگاری و گرفتی گەورە دەبێتەوە. هاوشان لەگەڵ  رازی کردنی چوارچێوەی هەماهەنگی، ناچارە چەندین هەنگاوی بوێرانە بۆ چەک کردنی گرووپە میلیشیاکانی سەربە ئێرانیش بنێت و ترامپ و ئیدارەکەشی لەخۆی رازی کات.ح