چەقبەستوویی سیاسی

چەقبەستوویی سیاسی
سەرباری کۆمەڵێک هەوڵ و دەستپێشخەری سیاسی لە ئاستی کۆمەڵگاو هێزە سیاسیەکانی گۆڕەپانی سیاسی هەرێم بە ئاراستەی خاوکردنەوەی گرژیەکان و دۆزینەوەی دەرچەیەکی بەپەلە، یەکێتی نیشتیمانی بەردەوامە لەسەر گرژی و جێگیرکردنی هەموو فاکتەرەکانی چەقبەستوویی سیاسی و عینادیەوە. 
هەمووان دەزانن هەرێمی کوردستان بە دۆخێکی ناسک و قەیراناوی سیاسیدا تێدەپەڕێ و دیزاین کردنەوەو داڕشتنەوەو لە قالب دانی رۆژهەڵاتی ناوەڕاست بەشێکە لە پلان و بەرنامەی ئیدارەی ئەمریکا جا بەهەر نرخێکەوە بێت. 
لە پاڵ ئەم پلان و ستراتیژیەشدا، دەرهاوێشتەکانی جەنگی ئێران کاریگەری بەسەر هەموو رۆژهەڵاتەوە لە رووی سیاسی، ئەمنی و ئابوری و سەربازیەوە دیارە. 
جەنگی ئێرانیش بە ئاراستەی لاوازکردن و نەهێشتنی هەژمونی ئێران لە ناوچەکە و زامن کردنی ئاسایش و بەرژەوەندیە ستراتیژیەکانی ئەمریکاو لاسەنگ کردنی ئەم بەرژەوەندیانە بەلای ئەمریکاوە، تا دێت دەرهاوێشتەکانی زیاتر دەردەکەون و هەوڵەکان چڕتر دەبنەوە. 
گوتاری سیاسی یەکێتی نیشتیمانی لەم دۆخەدا، تا دێت هەڵگری زبری و ناکارامەیی و ئاراستەیەکی دژە رێککەوتنی لەگەڵ پارتی .  
درێژەدان بە ململانێ و گوشارخستنە سەر پارتی بە ئامانجی ملدانی ئەم حزبە بە خواستە نالۆژیکیەکان یەکێتی،  رۆژانە لە میدیای فەرمی و نافەرمی یەکێتیەوە دەبیسترێت و دەهۆڵی بۆ درکوترێت. 
بەشێک لەم ململانێ و ئەرکی گەورەکردنی درز و کەلێنەکان بە نەوەی نوێ و سەرۆکی بزوتنەوەکە سپێردراوە. 
هەرکاتێک یەکێتی بیهەوێ گوشاری زیاتر بخاتە سەر پارتی، سەرۆکی بزاڤی نەوەی نوێ ئەجووڵێنێ و ناوبراویش خوا هەڵناگرێ  تا بۆی بکرێ و دەرفەتی هەبێ، بە زمانێکی بازاڕی و ناسیاسی و نادیپلۆماسی و خاڵی لەهەر نەرم و نیانی و نیەت پاکیەوە، دەبێتە هۆکاری  چەواشەکاری و  گرژی زیاترو تۆخ کردنەوەی ناکۆکیەکان و دروست کردنی گێژاوی میدیایی و دروست کردنی دڵەراوکێ و نائومێدی  زیاتر لە ئاستی کۆمەڵگاو شەقامدا. 
بەداخەوە  یەکێتی و سەرۆکی نەوەی نوێ بوونەتە هۆکاری لە جوانی کەوتنی 
کایەی سیاسی و فەوزاو و درێژەدان بەم چەقبەستوویی سیاسی و گرژی و ئاڵۆزیەی، دۆخی هەرێم هیچ پێویستی پێی نیە و تا دەشهێت ئەمان هەوڵەکانیان هەر بەم ئاراستە نانیشتیمانیانەیە. 
کارو چالاکی سیاسی، گێڕانەوەی مانایە بۆ چەمکی سیاسەت و پاراستنی ڕیزەکانی ناوەخۆو دوورکەوتنەوە لە دروست کردنی گێژاوی سیاسی. زیاد لەمەش لە ئەولەویەت دانانی ئەرک و بەرپرسیارەتیە نەتەوەیی، مێژوویی و نیشتیمانیەکان، بە تایبەت لە دۆخە هەستیارو سەخت و قەیراناویەکاندا.