بڕینی قۆناغەکان کە ئێستایەکی ئاڵۆزدا

بڕینی قۆناغەکان کە ئێستایەکی ئاڵۆزدا
هەموو ئەو گەلانەی قۆناغەکانی نەتەوەبوونیان تێپەڕاندووەو بە دەوڵەت و دەوڵەتداریەوە گەیشتوون، لە ئامادەیی خۆشویستنی نیشتیمان دەستیان پێ کردووەو باڵایان کردووە. 
ناسیۆنالیزم بە مانا کلاسیکیە وشک و ئەبستراکتەی نا، بەڵکو بە مانای پەیوەست بوون بە نەتەوەو هەوڵدان بۆ شکۆی نەتەوە و سەرفرازی گەل، خەبات و تێکۆشانێکی بێوچانی پێویستە. 
بەردەوامیدان بە خەبات و هەوڵدان بۆ گەیشتن بە ئامانجە دووروو نزیکەکان ، دەبێ بخرێتە سەرووی هەموو ئامانجێکەوە. 
گەلان دوای تێپەڕاندنی پرۆسەی نەتەوەسازی و بڕینی دەیان قۆناغی ناخۆش و هەورازو نشێوی سەختەوە، گەیشتن بە دەوڵەتسازیەوە. ئەم پرۆسەیە  بە گوێرەی گێڕانەوەکانی مێژووەوە هەروا بە ئاسانی ناگاتە ئامانج، بەڵکو هەوڵ و تێکۆشانی زۆری دەوێ و بە شەوو رۆژێک ئامانجەکانی ناپێکێت. 
پشوودرێژی، یەکڕیزی و خۆبەدوورگرتن لە فڕێدانی قسەی بۆش و هاشوهوشی سۆشیال مێدیاو وتی وتی سەرشاشە و هەڵگرتنی بەرپرسیارەتی لە پێداویستی و زەرووریاتی ئەم قۆناغە هەستیارەی ئێستان. هەر جۆرە پابەندبوونێکی کۆمەڵایەتی و ئەخلاقی بەم پرەنسیپانەوە، زامنی یەکپارچەیی و ئارامی و مسۆگەرکردنی خواستە نەتەوەییەکانی ئێستاو داهاتووە.
قۆناغی ئێستا پشوودرێژی و دان بەخوداگرتن و هەڵگرتنی بەرپرسیارەتی کە زەرووریاتیەتی. گەڵگرتنی بەرپرسیارەتی تەنیا گرێ نەدراوە بە یەک حزب و لایەنی سیاسی یا چین و توێژێکی دیاریکراوەوە. بەڵکو وەک پێویستیەکی حەتمی سەرجەم کۆمەڵگا و چین و توێژەکان دەگرێتەوەو هیچ لایەنێک ناتوانێ خۆی لێ بدزێتەوە.