کۆتایی هاتنی ئەرکی هاوپەیمانان

کۆتایی هاتنی ئەرکی هاوپەیمانان
نزیک بوونەوەی کۆتایی هاتنی ئەرکی هاوپەیمانان لە عێراق و هەرێمی کوردستان لە کاتێکدایە ناوچەکە هێشتا گیرۆدەی پەتای دۆخێکی ناسەقامگیرو پڕ لە مەترسی ئەگەری تووند بوونەوەی پەرەسەندنە ئەمنی و سەربازیەکانە. 
گرژیەکانی نێوان ئەمریکاو ئێران و ئەگەری دووبارە تووندبوونەوەیان و پەرەسەندنیان بۆ ئاستی دووبارەبوونەوەی ڕووبەڕووبوونەوە سەربازیەکان لە لایەک و ڕەت کردنەوەی چەکداماڵینی بەشێک لە میلیشیا تائیفیەکانی عێراق، زەنگی مەترسیداری ئەگەری تەقینەوەی دۆخەکەن. 
هەرێمی کوردستان سەرباری  راگەیاندنی بێ لایەنی لە جەنگ و ڕووبەڕووبوونەوە سەربازیەکانی نێوان ئێران و ئەمریکا، کەچی بۆ ماوەی زیاتر لە چەند مانگ کەوتە بەر پەلامارو هێرشی دڕندانەی درۆنیی سوپای پاسداران و میلیشیاکانیان لە عێراق و زیانێکی یەجگار زۆری مادی و گیانیشی بەرکەوت. 
وانەبێ ئامادەیی هێزەکانی هاوپەیمان لە هەرێمی کوردستان زامنی سەتاسەتی پاراستنی هەرێم بن لە هێرش و پەلامارە دەرەکیەکان. بەڵام بوونی ئەم هێزانە وەک زامنێکی نێودەوڵەتی و هاوکارو پشتیوانیکاری هێزەکانی پێشمەرگەو و دەزگا ئەمنیەکان، بۆ پاراستنی هەرێم و دامەزراوەکانی لە هەر هەوڵێکی دەستدرێژی کردن، تاڕادەیەک ئەرکی هێزەکانی پێشمەرگەی سوک کردبوو. 
تایبەتمەندی رۆژهەڵاتی ناوەڕاست بە درێژایی سەت ساڵی رابردوو سەلماندوویەتی،  پاراستنی ئاسایش و سەقامگیری سیاسی و سەربازی و زامنکردنی پێکەوەژیانی دەیان گرووپی ئەتنی و ئایینی و مەزهەبی دوو لەو ئاڵنگاریە گەورانەن، تەواوی ئەم ناوچەیە بەدەستیە گیری خواردووەو بووە بە مۆتەکەو کۆسپ و  بەڵایەکی گەورەوە. 
 پێشینەی خوێناوی مێژووی پێکدادانەکانی ئەم ناوچەیە  زەروورەتی بوونی هێزەکانی هاوپەیمان دووپات دەکاتەوەو کۆتایی هاتنی ئەرکەکانیان، عێراق بە گشتی و هەرێم بە تایبەتی ڕووبەڕووی ئاڵنگاریەکانی بۆشایی ئەمنی و سەربازی و سەرهەڵدانی گرووپی تێکدەرو تووندڕەوی نوێ دەکاتەوە.