ڤه‌گه‌ڕیانا هه‌ولێرێ بۆ به‌غدایێ و به‌غدا بۆ هه‌ولێرێ!
هۆگر نێروه‌یی
ئه‌وێ گۆتنا دبێژیت هه‌می بۆ من بیت و چ تشت بۆ ته‌نه‌بیت.. ئێدی چو بهایێ خوه نه‌مایه، به‌لكو ل جهێ ئه‌ڤێ گۆتنێ هه‌ڤپشكیكرن هه‌یه ل سه‌ر بنه‌مایێ ڕێككه‌فتنێ كو چه‌ند بۆ ته‌بیت و چه‌ند بۆ من بیت. كو ئه‌ڤ گۆتنه سه‌دا سه‌د بۆ هه‌رێمێ و به‌غدایێ نه‌ك هه‌ر پێدڤیه به‌لكو زه‌روره‌ته. هه‌ولێر پێدڤی ب به‌غدایه، به‌غدا ژی پێدڤی ب هه‌ولێره! نه ئیراق ب سزادان و ئابلۆقه‌دانا هه‌رێما كوردستانێ بهێز دكه‌ڤێت، نه هه‌رێما كوردستانێ ب لاوازبوونا ئیراقێ بهێز دكه‌ڤیت، به‌لكو هه‌ردو باجا دووركه‌فتنێ ژ هه‌ڤدو دده‌ن كو نه‌بووینه ئه‌و وه‌لاته و هه‌رێمه كو دهێته چاڤه‌رێكرن، د به‌رگێ فیدرالیێ دا سه‌رژنووی ژدایكبوون و ببه‌نه باشترین ده‌وله‌ت و هه‌رێم ل ده‌ڤه‌رێ.
ڕۆژهه‌لاتا ناڤه‌ڕاست پڕ ئاڵۆزترین و گرنگترین ده‌ڤه‌ره ل سه‌ر نه‌خشه‌یێ جیهانێ، سه‌قامگیریا ده‌ڤه‌رێ ب سه‌قامگیریا جیهانێ ڤه گرێدایه، ده‌ڤه‌ر ئارام بیت جیهان دێ ئارام بیت، ل گه‌ل هندێ ژی مه‌ترسیا ل ده‌ڤه‌رێ هه‌بیت مه‌ترسیا هه‌موو جیهانێ ڤه‌دگریت. ئیراق ژی چه‌ق و پێناسه‌یا ده‌ڤه‌رێ یه، كو سێ پشكا ئایینی و نیڤا گه‌لێن ده‌ڤه‌رێ ب خوه‌ڤه دگریت، ژبه‌ر هندێ سه‌قامگیریا جیهانێ ب سه‌قامگیریا ده‌ڤه‌رێ ڤه ب گشتی و ئیراقێ ب تایبه‌تی گرێدایه، سه‌قامگیریا ئیراقێ ژی ناهێته دی، هه‌تاكو هه‌رێما كوردستانێ سه‌قامگیر نه‌بیت، بنه‌مایێ سه‌قامگیریێ ل ده‌ڤه‌رێ زه‌روره‌ته ل هه‌رێما كوردستانێ و ب هۆستایه‌كێ كورد بهێته دانان، گه‌ر نه، جیهان ب گشتی و ده‌ڤه‌ر ب تایبه‌تی سه‌قامگیر و ئارام نابیت.
ل پشتی هاتنا داعشێ بۆ ئیراقێ و سووریێ كو ده‌ڤه‌ر و جیهان كه‌فتنه به‌ر هێرش و مه‌ترسیه‌كا مه‌زن، ئێكه‌تیا ئه‌ورۆپا ب سه‌ركردایه‌تیا فره‌نسا ب پشته‌ڤانیا ڕاسته‌وخوه‌یا ئه‌مریكا نه‌خشه‌ڕێیه‌كا نوو بۆ ده‌ڤه‌رێ دارشتیه، بۆ هندێ ده‌ڤه‌ر نه‌بیته رووگه‌هه‌كا گرۆپێن توندره‌و و هه‌روه‌سا بۆ ڕێگریكرن زێده‌تر ژ هه‌ژمۆنا توركیا و ئیرانێ، فره‌نسا هه‌رده‌م ته‌كه‌ز ل وێ ئێكێ دكه‌ت ل گه‌ل هه‌رێمه‌كا بهێزن ل ئیراقه‌كا ئێكگرتی و سه‌روه‌ری دا، فه‌ره‌نسا دڤێت ده‌ڤه‌ر ئارام ببیت، به‌لێ شاشیا پێش خوه دوباره‌ناكه‌ت كو كورد ل ده‌ره‌ڤه‌ی وێ هه‌ڤكێشێ بیت، به‌لكو بنه‌مایێ وێ ئارامیێ ژی ل هه‌رێما كوردستانێ دادنیت، كو سه‌ردانێن سه‌رۆكێ هه‌رێمێ چه‌ندین جاران بۆ كۆچكا ئه‌لیزێ بۆ ڤێ مه‌رمێ بوو كو ل هه‌ڤكێشێن نوو دا ڕۆله‌كێ كاریگه‌ر ب هه‌رێمێ دده‌ت.
ل ده‌مێ بۆری مه زۆر جاران ئه‌و تشت بهیستیه كو لاوازبوونا ئیراقێ د به‌رژه‌وه‌ندیا هه‌رێما كوردستانێ دایه، ل سه‌ر ئه‌ردی ئه‌ڤ په‌یڤه شاشه، به‌لكو ب لاوازبوونا به‌غدا ل ماوه‌یێ ڕابری ده‌رفه‌ت ب توركیا و ئیرانێ هاتیه‌دان كو زێده‌تر هه‌ژموونا خوه ل هه‌رێما كوردستان ڤه‌بكه‌ن. هه‌تا هه‌رێم سه‌ر ب ئیراقێ ڤه بیت د به‌رژه‌وه‌ندییا هه‌رێمێ دایه كو ئیراق یا بهێزبیت وه‌لاته‌كێ خوه‌دی سه‌روه‌ری بیت، بۆ هندێ نه‌ك هه‌ر جاره‌كێ وه‌لاتێن ده‌ڤه‌ر ل ژێر هه‌ر بهانه‌كێ هه‌رێمێ مووشه‌ك باران بكه‌ت. بۆ هندێ ئیراق ژی سه‌روه‌ری بۆ بڤه‌گه‌ڕیێت پێدڤی ب هه‌رێمێ یه. ئیراق و هه‌رێما كوردستانێ ژی پێدڤی ب رێككه‌فتنا نوو نینن، به‌لكو هه‌ر ئه‌وا هاتیه نڤیسین پێش پازده سالان كو هه‌موو گه‌لێن ئیراقێ ده‌نگ بۆ داینه كو دستوورێ ئیراقا فیدراله وه‌ك خوه بهێته جێبه‌جێكرن، جه‌وهه‌رێ كێشه‌یێن هه‌رێمێ و ئیراقێ دێ هێنه چاره‌سه‌ركرن.
هه‌تا هه‌رێما كوردستانێ سه‌ر ب ئیراقێ ڤه بیت، كورد ل ئیراقێ پێدڤی ب چه‌مكێ هه‌ڤوه‌لاتیبوونێ نه، نه‌ك گوتارا سه‌ربخوه‌یی و ناسیۆنالیزمێ. دبیت كورد نیازا خوه باش دیار بكه‌ن كو ڤه‌گه‌ڕییان بۆ به‌غدا ته‌نێ بۆ پۆست و چه‌ند سه‌د ملیاره‌كان نینه، به‌لكو بۆ چه‌مكێ هه‌ڤوه‌لاتیبوونێ یه كو د سازانێ و هه‌ڤپشكیێ و بڕیاردانا وه‌لاتی دا خوه دبینیت. ئیراق ژی دبیت ڤه‌بگه‌ڕیێت بۆ سه‌ر وی بنه‌مایی كو تشته‌كێ سه‌یره دامه‌زاره‌وه دستووری وه‌ك خوه جێبه‌جێ بكه‌ت، گه‌ر نه هه‌رێمێ مافێ خوه هه‌یه، داخوازا جودابوونێ بكه‌ت كو د ده‌ستووری دا هاتیه، ته‌نها جێبه‌جێكرنا ده‌ستووری زامه‌نێ مانه‌ڤه‌یا ئیراقێ ب ئێكپارچه‌یی یه.
جێبه‌جێكرنا دستووری ب تایبه‌تی ماده‌ێ 140 ڤه‌گه‌ڕیانه بۆ هێزا هه‌ڤپشكی یا هه‌رێمێ و ئیراقێ بۆ وان ده‌ڤه‌ران كو نها نه د ده‌ستێ ئیراقێ دانه و نه د ده‌ستێ هه‌رێمێ دانه كو د ده‌ستێ هێزێن ب وه‌كاله‌ت یێن وه‌لاتێن ئێرانێ و توركیان دانه كو (حه‌شدا شه‌عبی و په‌كه‌كه‌نه)، ئێدی هه‌م ئه‌و ده‌ڤه‌ره نه‌ڤه‌دگه‌رنه سه‌ر ده‌وله‌تێ و نه هه‌رێم ژی ب سه‌ر ده‌وله‌تێ ڤه، هه‌م هه‌ژمۆنا ئێرانێ كێم دبیت و هه‌م به‌هانه ژی بۆ توركیا نامینیت و له‌شكركێشیێ بكه‌ت كو په‌كه‌كه نه‌ما. وی ده‌می سه‌روه‌ری بۆ ئیراقێ ڤه‌دگه‌ڕیێت كو جه‌وهه‌رێ كێشه‌یێن ئیراقێ نه‌بوونا سه‌روه‌ریێ یه، و پێگه‌یێ هه‌رێمێ كوردستانێ ژی بهێزتر دكه‌ت زێده‌تر خوه دبینیت د هه‌ڤه‌كێشه‌یان دا، و قه‌یران ژی ب ساناهیتر دێ تێپه‌ڕینیت، هه‌روه‌سا دانانا هێزا كوردستانێ د به‌رگێ ئیراقێ دا بۆ سه‌ر سنوورێن هه‌رێمێ و وه‌لاتێن هه‌ڤسوی كو ل ده‌سپێكێ ئه‌و نیازه كو ئیراقێ و هه‌رێم دڤێت رێككه‌فتنه‌كا كۆنكرێتی بكه‌ن هه‌م بۆ ڤه‌گه‌ڕاندنا سه‌روه‌ریێ یه بۆ ئیراقێ هه‌م بۆ هندێ مه‌ترسی ژی ل سه‌ر هه‌رێمێ نه‌مینیت كو جاره‌كێ ئێران هه‌رێمێ مووشه‌كباران بكه‌ت، هه‌موو جاره‌كێ ژی توركیا ب به‌هانا په‌كه‌كێ له‌شكركێشیێ زێده‌تر بكه‌ت.
وەڵام بدەوه