ئەوەندەی ماهیەتێکی نیشتیمانی هەیە، پرسگرێکێکی نەژادی یا دەمارگیری نیە.
کەرکوک لەوەتەی کەوتۆتە بەر شاڵاوی پرۆسەی قێزەوەن و شۆفینیەتی ناسیۆنالیزمی عەرەبی لە لایەن عەڕابەکانی شاڵاوی ئەنفالە بەدناوەکان و راگواستن و قەڵاچۆکردنی نەژادی کورد، ئاسودەیی بەخۆیەوە نەبینیوە.
رژێمە داپڵۆسێنەرە شۆفینیەکانی دەسەڵاتداری عێراق هەر لە زەمەنی حوکمرانی پاشا هەژمونگەراکان و دواتر کۆماری و دیکتاتۆرەکانەوە و نەمازە لەو ساتەی نەوت لەم پارێزگا کوردنشینە دۆزراوەتەوە، سڵیان لە هیچ کردەیەکی دژە کورد و نائینسانی دژبە زۆرینەی کوردی ئەم پارێزگایە نەکردۆتەوە.
کەرکوک بەلای کوردەوە هێمای پێکەوەژیانی ئاشتیخوازانەو مۆرک و ئایکۆنی کوردبوونە.
هەوڵدان بۆ گۆڕانکاری کردن لە دیموگرافیای پارێزگای کەرکوک لە دێرزەمان و نیوەی دووەمی سەدەی بیستەمدا خراوەتە گەڕو تا دواساتەکانی هەڵوەشانەوەی رژێمی داپڵۆسێنەری بەعسیش بە خێرایی بەردەوامی پێدرا.
دوای بەعسیش دەسەڵاتدارانی هەژمونگەرای مەزهەبی شیعە بەردەوامیان داوە بەم سیاسەتە شۆفینیە و هێشتنەوەی دۆخەکە وەک خۆی، بەڵام لە ژێر دەمامک و پەردەو نیەتی شاراوەی ترەوە.
هەروەک لای هەمووان روونە لە هەژدەساڵی رابردووی قۆناغی پۆست بەعسیشدا و بەهۆی نەبوونی پارێزگارێکی خاوەن بریار و پێداگر و کوردپەروەرەوە، جێ بەجێبکردنی داواکانی کورد و مادە دەستوریەکانی پەیوەست بە نەهێشتنی ئاسەواری تەعریب و راگواستن لە پارێزگای کەرکوک، دەستی دەستی پێ کراوەو تەنانەت یەک مادەی دەستوریش نەکەوتۆتە بواری جێ بەجێ کردندا.
هەڵبەت دۆخی دوای رووداوە دڵتەزێنەکانی شازدە ئۆکتۆبەر و دانانی پارێزگارێکی شۆفینی عەرەب، نەک دۆخی کەرکوکی بۆ زۆرینەی کوردو پێکهاتەکانی ترەوە ئاسایی نەکردەوە، بەڵکو هانی عەرەبە هاوردە ئێکسپایەرەکانی پاشماوەی تەعریبیشی دا هەوڵی دەرپەڕاندن و دەست بەسەرا گرتنی موڵکوماڵ و زەوی و زاری دانیشتوانە رەسەنە کوردەکانی پارێزگاکەش بدەن.
بۆیە دانانی پارێزگارێکی نیشتیمان پەروەری کوردی خاوەن بریارو هەڵوێست و بە توانا، لەم دۆخە پڕ لە نائومێدیەی دوای رووداوەکانی شازدە ئۆکتۆبەر باڵی بەسەر پارێزگاری کەرکوکدا کێشاوە، پرسێکی هەستیارو ژیاریەو پێدڤیە دەسەڵاتدارانی هەرێمی کوردستان پێداگری لەسەر بکەن و بە هیچ شێوەیەک سازش لە سەر دانانی پارێزگارێکی کوردپەروەرو نیشتیمان پەروەرەوە نەکەن و کۆتایی بەم دۆخەی نائومێدی و پەراوێزکەوتنی کەرکوک ناوچەدابڕێنراوەکانی ترەوە بێنن.
وەڵام بدەوه