ھەر گۆرانکاریەک نەبێتە ھۆی بەرھەم ھێنانی ژینگەیەکی سیاسی نوێ و تێروانینی تازە دھەمبەر کولتور و کۆمەڵ و سیاسەت و نیشتیمان و بەرپرسیارەتی و ویژدان و ماناو ناوەرۆکێکی تازە نەدات بەژیان و مافی ھاوڵاتی بوون، ئامانجی خۆی ناپێکیت و رووکەشانە دەبێت.
رووخانی سەدام بە لای عێراقیەکانەوە وێنای خاڵێکی وەرچەرخانی گەورەی یەکلاکەرەوەی لێدەکرا و ئومێدێکی زۆری لەسەر هەڵچنرابوو.
لێ ساڵانی دوای رووخانی بەعس، ئەو ژینگە سیاسیەی نەهێنا ئاراوە ببێ بە بنەمای یەکتر قەبوڵ کردن و پلۆراڵیزم و گەشەی وڵات و هێنانەدی خواست و ئومێدی عێراقیەکان.
لە بری ئەمە چارەنووسی ئەم وڵاتە لە نێو گێژاوی هەژمونگەرایی دەرەکی و ململانێ تائیفی و سیاسیەکاندا قەتیس ماوەو هەر رۆژەو بەدەست کێشەو گرفتێکی تازەوە دەناڵێنێ و کۆمەڵێک بۆشایی سیاسی لە عەقڵ و مەعریفەو تێگەیشتنی سیاسی نوێوە دوای خۆی بە جێ دەهێڵێ.
زیاد لەمەش پرسی کورد سەرباری بڕینی چەندین قۆناغ و هەڵبەزو دابەزی سیاسیەوە ئێستاشی لەگەڵدابێ نەیتوانیوە بەربەستە فکریەکانی تائیفی و تێگەیشتنە هەڵەکان و دیوارو پەرژێنە سایکۆلۆجیەکانی نەژادی سەردەستە، لای زۆرینەی عەرەبی عێراقی بگۆڕێ و بیکا بە کەرەسەیەکی مەعریفەی سیاسی نوێ و تێڕوانینێکی نوێ لای نوخبەی دەسەڵاتدارانی بەغداوە دروست بکات.
وەڵام بدەوه