هۆشداری ترەمپ گەیشتە تاران

ئەمڕۆ هەینی، دۆناڵد ترەمپ، سەرۆکی ئەمریکا لە وەڵامی ڕۆژنامەنووساندا جەختی لەوە کردەوە کە کۆماری ئیسلامیی ئێران لە سەرووی لیستی ئەو پرسانەدایە کە لە نزیکەوە بەدواداچوونی بۆ دەکات.

ترەمپ بە ئاماژەدان بە ناوەڕۆکی نامەکەی بۆ عەلی خامنەیی، ڕابەری کۆماری ئیسلامیی ئێران گوتی: "لە نامەکەدا، گوتم دەبێت بڕیار بدەین. یان دەبێت قسە بکەین و لە ڕێگەی دانوستانەوە کێشەکە چارەسەر بکەین، یان شتگەلێکی زۆر خراپ بەسەر ئێراندا دێت، من نامەوێت ئەوە ڕووبدات". ترەمپ بە جەختکردنەوە لەسەر خواستی خۆی بۆ چارەسەرکردنی گرژییەکان بە شێوەیەکی ئاشتییانە، گوتی: "خواستی سەرەکیی من، نە لە پێگەی بەهێزییەوە، نە لە پێگەی لاوازییەوە، پەیوەندیکردنە. ڕێککەوتنێکە لەگەڵ ئێران، بەڵام ئەگەر ئەمە ڕوونەدات، ئێران ڕووبەڕووی دەرئەنجامە زۆر زۆر خراپەکان دەبێتەوە."