فەرەنسا هۆشداری دەدات "کاتمان بەدەستەوە نەماوە"

بڕیارە ڕۆژی سێشەممە خولێکی نوێی دانوستان لە نێوان ئێران و وڵاتانی ئەوروپی سەبارەت بە بەرنامە ئەتۆمییەکەی تاران بەڕێوەبچێت. هاوکات، وەزیری دەرەوەی فەرەنسا هۆشداری دەدات و دەڵێت "کاتمان بەدەستەوە نەماوە" بۆ گەیشتن بە چارەسەرێکی سیاسی و خۆلادان لە سەپاندنەوەی سزاکان بەسەر کۆماری ئیسلامی ئێران دا.
ڕۆژی هەینی 22ـی ئابی 2025، ژان نوێل بارۆ وەزیری دەرەوەی فەرەنسا و یۆهان فادیفۆڵ وەزیری دەرەوەی ئەڵمانیا و دەیڤد لامی وەزیری دەرەوەی بەریتانیا و کایا کالاس بەرپرسی سیاسەتی دەرەوەی یەکێتی ئەوروپا پەیوەندییەکی تەلەفۆنیان لەگەڵ عەباس عێراقچی، هاوتا ئێرانییەکەیان ئەنجامدا.
وەزیری دەرەوەی فەرەنسا لە پۆستێکدا لە تۆڕی ئێکس نووسیویەتی، "کاتمان بەدەستەوە نەماوە."
فەرەنسا، بەریتانیا و ئەڵمانیا ئامادەکاری دەکەن بۆ کاراکردنی میکانیزمی گەڕاندنەوەی سزاکان کە لە ڕێککەوتنی ئەتۆمیی ساڵی 2015 دا هاتووە و بە "میکانیزمی پەلەپیتکە" (snapback) ناسراوە، ئەمەش ئەگەر چارەسەرێکی گونجاو نەدۆزرێتەوە.
وڵاتانی ئەوروپی تاران بە پابەندنەبوون بە بەڵێنەکانی تۆمەتبار دەکەن و دەیانەوێت ئێران دوور بخەنەوە لە دروستکردنی چەکی ئەتۆمی.
تاران جەخت لەوە دەکاتەوە کە لەگەڵ چین و ڕووسیا هەماهەنگی دەکات بۆ ڕێگریکردن لە گەڕانەوەی سزاکان