ترەمپ کۆتایی جەنگی ئێران رادەگەینێت

دۆناڵد ترەمپ: ئۆپراسیۆنەکانی تایبەت بە ئێران زۆر بەزوویی کۆتاییان دێت و نرخی بەنزین دادەبەزێت 
ئەمڕۆ شەممە 17ی تشرینی یەکەم، دۆناڵد ترەمپ سەرۆکی ئەمەریکا دووپاتی کردەوە کە ئەو ئۆپراسیۆنانەی پێوەندییان بە ئێرانەوە هەیە زۆر بەزوویی کۆتاییان دێت و ئەوەش دەبێتە هۆی دابەزینی نرخی بەنزین، هاوکات ڕێگری لە گەڕانەوەی توانای چەکی ئەتۆمی بۆ ئەو وڵاتە دەکرێت.
دۆناڵد ترەمپ سەرۆکی ئەمەریکا لە لێدوانێکدا دووپاتی کردەوە کە ئۆپراسیۆنەکان بەزوویی کۆتاییان دێت. لەبارەی دۆخەکەوە زیاتر گوتی، "پێویستە دڵنیا ببینەوە لەوەی تواناكانی چەکی ئەتۆمیی ئێران ناگەڕێنەوە، ئەمەش ئەوەیە کە ئێستە کاری لەسەر دەکەین".
دوێنێ هەینی، ترەمپ ڕای گەیاندبوو کە ئۆپراسیۆنی سەربازیی ئەمەریکا و ئیسرائیل دژی ئێران خێراتر لەوەی هەندێک کەس پێشبینی دەکەن، کۆتایی دێت.
لە کاتی خستنەڕووی دەستکەوتەکانی جەنگدا، ترەمپ هەمیشە ئەوە دووپات دەکاتەوە کە توانا سەربازییەکانی ئێران بەتەواوی تێک شکێنراون.