سبەیی شەو دوا مۆڵەتە

وەزارەتی کارەبا: سبەی دوا مۆڵەتە بۆ داشکاندنی قەرزی کارەبا
ئەمڕۆ شەموو 17ی تشرینی یەکەم، وەزارەتی کارەبای حكوومەتی هەرێمی کوردستان ئاگادارییەکی بڵاو کردەوە و تێیدا هاتووە كە سبەی یەکشەم دوا مۆڵەتە بۆ سوودمەندبوون لە لێخۆشبوونی سەدا 50ی قەرزی کارەبای ماڵان و سەدا 25ی پۆلی بازرگانی.
لە ڕاگەیەنراوێکی وەزارەتی كارەبادا هاتووە، سبەی یەکشەم 18ی تشرینی یەکەم، دوا ڕۆژی داشکاندنی لە 50%ی قەرزی کۆنی کارەبای ماڵان و لە 25%ی پۆلی بازرگانییە کە دەکەوێتە پێش پڕۆژەی ڕووناکی.
بۆ ئەم مەبەستە، سەرجەم فەرمانگەکانی فرۆشیاری وزە لە سەرانسەری هەرێمی کوردستان، ڕۆژی یەکشەم لە سەعات هەشت و 30 خولەکی بەیانی تا ئێوارەی هەمان ڕۆژ دەوام دەکەن و تا هاوبەش مابێت لە خزمەتی هاوبەشانی کارەبادا دەبن.
لە ڕاگەیەنراوەکەدا زیاتر هاتووە، هاوبەشانی کارەبا دەتوانن لە ڕێگەی (ئێ پسوولە)ـەوە قەرزی کارەباکەیان بە داشکاندنەکەوە تا سەعات 12ی نیوەشەو بدەنەوە. دوای تەواوبوونی ئەم ماوەیە، قەرزی کارەبای پێش پڕۆژەی ڕووناکی دەبێتە قیستی مانگانە و لەگەڵ کرێی مانگانە وەردەگیرێتەوە.