بارانبارین دەسپێدەکات

شارەزایەكی كەشناسی رای دەگەیەنێت، كەشوهەوا تەواو گۆڕاوە و سبەی باران و هەورەبروسكە لە هەرێمی كوردستان دەست پێ‌ دەكات.، ئاراس جەبار كەشناس، راگەیاند، سبەی پێنجشەم لە ئەنجامی كاریگەریی نزمەپاڵەپەستۆی دەریای سوور لەسەر ناوچەكانمان و بەردەوامی كاریگەریی بارستە هەوای سارد لەسەر چینەكانی سەرەوەی بەرگەهەوا، حاڵەتێكی لاوازی ناجێگیری كەشوهەوا لە هەرێمی كوردستان و ناوچەكە دەست پێ دەكات.
ئەو كەشناسە زیاتر گوتی، سەرەتاش لە كاتەكانی نیوەڕۆ لە ناوچەكانی رۆژئاواوە لە سنووری پارێزگای نەینەوا و دهۆك، پاشان لە كاتەكانی دوای نیوەڕۆ بۆ شەو لە ناوچەكانی سنووری پارێزگای هەولێر و سلێمانی و كەركووك و هەڵەبجە و ئیدارەی راپەڕین و سۆران و باكوری گەرمیانیش دەست پێ دەكات.
ئاماژە بەوەش دەكات، ئەو گۆڕانی كەشوهەوایە، خۆی دەبینێتەوە لە دروستبوونی كەڵەكەهەوری بە بروسكە و ناوبەناو تاوەبارانی لاواز بۆ مامناوەند لە شوێن و كاتی جیاوازدا دەبارێت، بەگشتی لە شەودا رێژەی باران و چالاكبوونی هەورەبروسكەكان زیاتر دەبێت، رێژەی بارانی چاوەڕوانكراویش بۆ زۆربەی ناوچەكان لە نێوان 0.5 بۆ 1 ملیم دەبێت تا زۆرترین رێژە 3 بۆ 6 ملم بەتایبەت لە ناوچە شاخاوییەكان، لەوانەیە لە هەندێ شوێنیشدا هەوری چڕ و چالاكتر دروست ببێت و رێژەیەكی زیاتر باران ببارێت، پلەكانی گەرما بە جێگیری دەمێنێتەوە.