شەڕ کۆتایی دێت

ئێستا هەوڵێكی رژدی وڵاتانی كەنداو بۆ دووبارەنەبوونەوەی شەڕ و ئاساییكردنەوەی دۆخی ناوچەكە هەیە، لە قەتەر دانوستانەكان لەگەڵ هەردوولا بەڕێوە دەچن بۆ رازیكردنیان بۆ رێككەوتن، ئەمڕۆ وەزیری دەرەوەی ئەمەریكا رای گەیاند كە ئامادەن بۆ رێككەوتن لەگەڵ ئێران.
لە كۆتایی كۆبوونەوەی كۆمەڵەی حەوت وڵاتی پیشەسازی لە پاریس، ماركۆ رۆبیۆ بە رۆژنامەوانانی راگەیاند، واشنتن ئامادەیە بۆ گەیشتن بە رێككەوتنێكی باش لەگەڵ ئێران، واشنتن بە پێویستی نازانێت ئێستە ئۆپراسیۆنێكی گەورەی سەربازی لە دژی تاران ئەنجام بدرێت، سەرۆك ترەمپ بڕیاری داوە كە ئێستە پێویست بە دەست پێكردنەوەی هێرشی گەورەی سەربازی لە دژی ئێران ناكات، چونكە سزا ئابوورییەكان زۆر بە باشی كاری خۆیان دەكەن.
روونی كردەوە، پێم وایە ئێران رێككەوتنی پێ باشترە، بەڵام هێشتا نەگەیشتووەتە قۆناغێكی رژد لەوبارەوە، كێشەكە لەوەدایە مەرجەكانی دەیانخاتە روو بێمانان، بۆیە ئەو رژد نییە، بەڵام رەنگە ئەوە بگۆڕێت، چونكە لە كۆتادا دەبێت رێك بكەوێت، ئەو گوشار و ئازارە ئابوورییەی خراوەتە سەر رژێمی ئێران زۆر گەورەیە و رۆژ دوای رۆژ زیاتر دەبێت و بە تێپەڕبوونی كات توندتر و بەئازارتر دەبێت.