لە چەند زانکۆیەکی ئەهلی ساڵی یەکەمی خوێندن دەکرێت بە خۆرای

لە بەشێك لە زانكۆ ئەهلییەكانی هەرێمی كوردستان، خوێندنی ساڵی یەكەمی زانكۆ كرایە خۆڕایی، ئەوەیش بەهۆی ئەو پێداچوونەوەیەی حكوومەت كردوویەتی بۆ وەرگرتنی قوتابیان كە ئەمساڵ سەرجەمیان وەردەگیرێن.
خوێندن لە زانكۆكانی هەرێمی كوردستان لە كابینەی نۆیەم، پێشچوونی باشی بەخۆیەوە بینیوە و بەشێك لە زانكۆكان، ئێستە بەهۆی ئەو كێبەركێیەی دروستیان كردووە، خوێندنی یەكەم ساڵیان كردووەتە خۆڕایی.
بەپێی بەدواداچوونێك ، ئێستە دوو زانكۆی ناحكوومی لە هەرێمی كوردستان بۆ خوێندنی یەكەم ساڵی قوتابیان، خوێندنی كردووەتە خۆڕایی، ئەوەیش بەهۆی ئەو كێبەركێیەی دروست بووە و حكوومەت سەرجەم قوتابیان بۆ ئەمساڵ لە زانكۆ و پەیمانگەكان وەردەگرێ‌.

ئەوەیش زانراوە، بەفەرمی دوو زانكۆ سكۆلارشیپی خۆڕایی 100%یان راگەیاندووە، پێشبینی دەكرێت چەند زانكۆیەكی تری ئەهلیش هەمان هەل رابگەیەنن یان كرێی خوێندن بە تەواوی دابەزێنن.

دوێنێ‌ عەبدولفەتاح عەبدولڕەزاق بریكاری وەزارەتی خوێندنی باڵا و توێژینەوەی زانستی،  گوتی، دوای تەواوبوونی زانكۆلاین،  ئێستە كار لەسەر ناوەكان دەكرێت كە داواكارییان بۆ زانكۆ و پەیمانگەكان پێشكەش كردووە.

روونیشیكردەوە كە قوتابییەكان بەپێی ئیستیحقاقی خۆیان لە زانكۆ و پەیمانگەكان وەردەگیرێن، كە نزیكەی 36 هەزار قوتابی و بەشێكیشی هی ساڵی ڕابردوو مابوون، بۆیان هەبوو فۆرمی زانكۆلاین پڕ بكەنەوە.

بەرپرسەكەی وەزارەتی خوێندنی باڵا و توێژینەوەی زانستی گوتی، كورسیمان بۆ هەموو قوتابیان بە زیادەوە هەیە، بەڵام ڕەنگە بەشێك لە قوتابیان خواستی زانكۆ ئەهلییەكانیان هەبێت، بەڵام لە ماوەیەكی نزیكدا ناوەكان یەكلا دەكرێنەوە.