جێگری پارێزگاری ھەولێر ئاماژەی بۆ ئەوە کرد، پڕۆژەیەک ئامادە کراوە تا ئاو لە بەنداوی گۆمەسپانەوە بگەیەندرێتە ناوچەی کەسنەزان و مەبەست لەو پڕۆژەیە زیادکردنی ئاوی ژێرزەوی و ئەنجامدانی پڕۆژەی گەشتیارییە.
مەسعود کاڕەش، جێگری پارێزگاری ھەولێر، بە ماڵپەڕی فەرمیی پارتی دیموکراتی کوردستانی ڕاگەیاند: "پڕۆژەیەک ئامادە کراوە بۆ ڕاکێشانی ئاو لە دەربەندی گۆمەسپانەوە بۆ بەرزایییەکانی شارەدێی کەسنەزان و پڕۆژەکە حەوت ملیار دیناری تێ دەچێت و ئاو لە بەنداوی گۆمەسپانەوە دەگەیەندرێتە کەسنەزان، پڕۆژەکە ئامادەیە و چاوەڕێی وەرگرتنی ڕەزامەندیین بۆ ئەوەی بکەوێتە واری جێبەجێکردنەوە، لەبەر ئەوەش کاتەکەی دیاری نەکراوە کەی دەست پێ دەکات.''
جێگری پارێزگاری ھەولێر گوتیشی: "پڕۆژەکە ئەگەر بچێتە واری جێبەجێکردنەوە چەندین سوودی دەبێت بۆ شاری ھەولێر و دەوروبەری، چونکە ڕاکێشانی ئاو لە گۆمەسپانەوە بۆ ئەو ناوچەیە دەبێتە ھۆی بووژانەوەی ناوچەکە لە چەندین ڕووەوە.''
مەسعود کاڕەش ئاماژەی بۆ ئەوەش کرد: "مەبەست لە جێبەجێکردنی ئەو پڕۆژەیە بۆسێ ھۆکار دەگەڕێتەوە، یەکەم زیادکردنی ڕێژەی ئاوی ژێرزەوی لەو ناوچەیە، ھەروەھا دەبێتە پڕۆژەیەکی گەشتیاریی گرینگ بۆ ھەولێر و لە داھاتوودا دەکرێت بۆ سەرچاوەی ئاوی خواردنەوەش بەکار بێت، بەتایبەتی بۆ ناحیەی کەسنەزان.
وەڵام بدەوه