جیھانا ژنێ و جیھانا زەلامی!
جیھانا ژنێ تمامی جیاوازە دگەل جیھانا زەلامی، لێ جیھانێن ھەردووکان تمامکەرێن ھەڤدوونە، نابیت زەلام مینا جیھانا خۆ بنێریتە جیھانا ژنێ بەڵکو دڤێت شارەزاییەکا تمام ھەبیت بۆ جیھانا ژنێ پاشان داخل بیت،ھەڤدەم ژن ژی ڤێت بزانیت ئەو جیھانا زەلامی چتشتی دخازیت پاشان دەرگەھی بقوتیت. گەر نە ھەردوو رەگەز مینا جیھانا خۆ ل جیھانا ھەڤدوو بنێرن خۆ نەگوھرن دێخو بەرزەکەن جیھانا ھەڤدوودا چوجاران ھەست ب ھەبونا خۆ ناکەن. زەلام بۆ ھندێ ل جیھانا ژنێ دا ژیانێ بکەت ڤێت بزانیت سایکۆلوژیا وێ جیھانێ چاوا ھاتیە نەخشاندن، ھەڤدەم ژن ژی ڤێت سایکۆلۆژیا جیھانا زەلامی بتمامی بزانیت بۆ ھندێ تووشی چ تاریاتیان نەبیت.
سایکۆلۆژیا ھەردوو جیھانان بتمامی جیاوازە گەر تێنەگەھی مینا چیایەکێ ل سەر پشتاتە لێ گەر تێبگەھی بساناھی ھەمی گرفت و بەربەستان تێپەرینی. شەنگستێ جیھانا ژنێ گرنگیپێدانە، شەنگستێ جیھانا زەلامی باوەری پێبونە. جیھانا ژنێ چوجاران تشتەکێ ل زەلامی ناخازیت کو دەسھەلاتاوی زێدەتربیت بەڵکو ھەردەم وی تشتی لێ دخازیت کو ھەیە لێ دەرنابریت. جیھانا زەلامی ژی بتنێ پێتڤیا ب ئارامی و بێنفرەھبی تا پێسترکان ب سەربکەڤی گەر ئارام نەبی دێ پێسترکان دا کەڤی و نارابی.
جیھانا ژنێ دەما تورەدبیت دخازیت باخڤیت ھند باخڤیت ھەتا ھەر تشتێ دلی دایە چەند جاران دووبارەبکەت، ل وی دەمی جیھانا ژنێ تنێ ل زەلامی ڤێت گوھدارەکێ باش بیت و بێیکو چاڤەرێ بیت ئاریشا وێ چارەسەربکەت، دەما گوھدانێ ژی ب شێوەیەکی بیت کو دل حەزکرن گوھداریێ دکەت بێی بێزار بیت چاڤان ل چاڤێن ژنێ ڤەنەکەت، لێ جیھانا زەلامی دەما توورەدبیت حەز بێدەنگیێ و تنێ بوونێ دکەت، چاڤەرێ دکەت ژن وی بتنێ بھێلیت نەھێتە جیھاناوی دا دگەل باخڤیت بەڵکو ھند چاڤەرێ بیت ھەتا زەلام بخو ئاریشا خوە دبێدەنگیێ و تنێ بوونێ دا چارەسەردکەت پاشان دەرگەھێ جیھانا خۆ بدلخازی بۆ ژنێ ڤەکەت.
جیھانا ژنێ ھەردەم پێتڤی ب گرنگی پێدانێ و وەسفکرنی و پاداشت کرنێ یە، ژن پاداشتێ مەزن ل زەلامی نەڤێت بەڵکو ھندەک پاداشتێن بچیک لێ ب گرنگیدانبن، مینا ھەردەما خارنێ دخۆی دەستخۆشیێ لێبکەی بۆ ئامادەکرنا وێ خارنێ گەر ھندەک جاران خارنا وێ وەکو پێتڤی ژی نەبیت نابیت لومەی لێبکەی چونکە جیھانا ژنێ لومەکرن بشەرم و شکاندنا خۆ دزانیت، ھەردەم ڤێ دوبارەبکەی تو ھەردەم یا جانی لێ ئەڤرۆ جانتر دھێیە بەرچاڤێن من، ژن پێتڤی ھندێ نینە تۆ ھەردەم ئەلماسەکێ یان تشتەکێ بوھا بوبینی بەڵکو دەما تو تشتەکێ بچیک ژی بۆ بینی مینا گولەکێ یان تشتەکێ دی ھەروەک تە بۆ مەزنترین ئەلماس و زێر بۆ ئینای چونکە ژن دێ ھەست پێکەت ھەردەم ل بیرا زەلامی یە و یا بۆ گرنگە.
جیھانا زەلامی ھەردەم پێتڤی باوەریپێبونێ و بێن فرەھیێ ھەیە، نابیت چوجاران ژن وی شاشیێ بکەت کو زەلامەکێ دن بینتە جیھانا زەلامێ خودا دەما زەلام دکەڤیتە ئاریشەکێ دا، مینا ل فلان زەلامی بپرسە ئەو دشێت ھاریکاریا تەبکەت، ئەڤە مەزنترین تاوانە د جیھانا زەلامی دا، چونکە زەلام وەسا ھزرکەت ئەو کەسەکە نەشێت کێشان چارەسەربکەت ھەست ب شکەستنا خۆ و شەرمێ دکەت. کو وەکو پێتڤی نینە، سروشتێ جیھانا زەلامی وەسایە ھەردەم دخازیت ئەو بخو ئاریشان چارەسەربکەت بتنێ پێتڤی ھندێ یە باوەریا تمام بدەیێ، مینا بەلێ توتشێی ڤی کاری بکەی، شیانێن تە گەلەک ژڤێ ئاریشێ مەزنترن، ھەردەم ب شیانێن تە سەرسامین ھەر تشتێ تە دەستێ خۆ ھاڤێتیێ تە چارەسەرکریە.
یال ھەمیا گرنگتر دەما توورەبونێ دا نابیت ل ھەڤ گۆمان بن، زۆر جاران ژن ھند تورەدبیت نزانیت چاوا تورەبونا خۆ دەربێخیت، ڤێ گوتنێ دەردئێخیت من چوجاران خۆشی دگەل تە نەبویە، ژیانامن ھەمی نەخۆشی بۆیە دگەلتە یان تە ھەمی ژیانامن نەخۆش و رەشکریە، نابیت دەما تورەبونێدا ڤان گوتنا وەک خۆ ل سەر ژنێ حساب بکەن چونکە ژنێ چوجاران مەرەم پێ ئەو ئاخفتن نینن بەڵکو تنێ وی دەمی دا ھندی ھندا بێزار و تورەیە ڤان ئاخفتنا بێژیت بێیکو ھەست پێبکەت چ گوتن دەڤی دەردکەڤن. زەلام ژی دەما تورەدبیت ھەر پێتڤی ھندێ یە وی بھێلیە بتنێ بێی بەرسڤا گوتنێن وی بدەت چونکە ھەتا زێدەتر گەل باخڤی و بەرسڤا وی بدەی زێدوتر تورەدبیت لەوما پێتڤی بھێلیە بتنێ و بشێی نەئاخڤی ھەتا تورەبونا وی دھێتە خارێ.
گرنگە بزانین جیھانا ژنێ و زەلامی دەما تورەبونێدا دەمکی یە نە سرۆشتێ جیھانا وانە، ئەو گوتن ب تنێ تورەیبونێ دا دھێن گەر نە دەمێن دیدا جھێ خۆ دجیھانا وان دا ناکەن. گەر ژن و زەلام ھەڤ بگەھن ل جیھانا ھەردویان دا نینە شرینتر لێ گەر ھەڤ نەگەھن نینە ل جیھانا واند تەعلتر مینا ژەھرا ماری یە.
#HogirNerwayi
وەڵام بدەوه